بایرامیدی گیجه قوشی اوخوردی
آداخلی قیز بیک جورابین توخوردی
هرکس شالین بیر باجادان سوخوردی
آی نه گوزل قایدادی شال سالاماق
بیک شالینا بایراملیغین باغلاماق
شال ایستدیم منده ایوده آغلادیم
بیرشال آلوب تیز بلیمه باغلادیم
غلام گیله قاشدیم شالی سالادیم
فاطمه خالامنه جوراب باغلادی
خان ننه می یاده سالوب آغلادی
بایرام اولوب قیزیل پالچیق ازللر
ناقیش وروب اتاقلاری بزللر
طاقچالارا دوزمه لری دوزللر
قیزگلینین فندقچاسی حناسی
هوسلنور آناسی قایناناسی
باکی چینون,سوزو,سوو,کاغیذی
اینکلرون بولاماسی آغیزی
چرشنبه نون گردکانی مویزی
قیزلار دیر آتیل ماتیل چرشنبه
آینا تکین بختیم آچیل چرشنبه